طحنية وشوية سلطة

تررن.. تررن.. تررن.. تررن.. دا في الحقيقة كان جرس الموبايل اللي عمال يرن.. وأنا ماليش مزاج خاااااااااالص أرد.. الموبايل مرمي على المكتب قدامي وأنا قاعدة على السرير.. فارشة جرنان الأهرام.. أقرأ بريد الجمعة.. أصل الحكاية ناقصة خنقة.. وكمان بالمرة أشوف إعلانات المدن الجديدة.. أهو برضه نتفرج.. من حق أي مواطن إنه يتفرج حاكم الشقق في المدن الجديدة دي.. لفرجة المواطن المصري.. وممنوع الاقتراب واللمس والتصوير.. والإضافة بقى كمان التفكير.. ممنوع مجرد التفكير إنك تحلم يكون ليك مكان هناك.. يللا ما علينا..
وبرضه التليفون لسه.. ترررن.. ترررن.. قلت: مابدهاش أشوف مين اللي مصمم يعكر صفو الخنقة اللي أنا فيها.. ولقيتها (لولو) صحبتي صديقتي اللدودة.. لولو دي لوحدها قصة..

ودار بينا الحوار..
أنا: أيوة يا ست هانم.
لولو: أنت فين يا قطتي.. مبترديش ليه.
أنا: عادي يا لولو مخنوقة ومش طايقة نفسي.
لولو: وأنت من أمتي كنتي طايقة نفسك.. أنا اللي مش عارفة أنا طايقاكي ازاي..
أنا: بقولك إيه ماليش دماغ خالص للكلام ده..أنا لسه حتى مضربتش فنجان النسكافية بتاعي.. ولسه مفقتش..
أصلي في الحقيقة بقعد ساعتين فاصلة عن الحياة.. أول ما أصحى من النوم ومش بفوق غير بفنجان النسكافيه.. اللي بيعملهولي الأوفيس بوي في الشركة.. فيوم الإجازة بيبقى صعب أوي من غيره.. إدمان بقى..
لولو: طب تعالي بعد الصلاة هعزمك على حتة أكلة كنتي هتموتي عليها..
أنا: والله يا لولو مش قادرة..
لولو: تعالي بس هتنبسطي أوي.. والله دا حتى إيمو جاي معانا..
أنا: طب إنتو خارجين.. أنا آجي بقى أقعد عزول مش ناقصة حرقة دم.. هفضل أبحلق وأفنجل عينيَّا الاثنين وأحسدكم..
لولو: يا شيخة اتنيلي.. تحسدي إيه.. هعدي عليكي الساعة 5 تكوني جاهزة..
أنا: قرفانة ومخنوقة و.....
ولسه بكمل كلامي.. لقيت طبعًا لولو قفلت السكة في وشي.. عادي يعني عادتها ولا هتشريها.. أصلها منين ما أكون قرفانة.. لازم تزهقني في عيشتي أكتر والاسم صاحبتي.. وفعلاً مكدبتش خبر والساعة 5 بالدقيقة كانت عاملة فرح زمامير تحت البيت.. وطبعًا غصب عني لبست ونزلت.. البنت جايَّه من آخر الدنيا.. وعازماني هي وخطيبها.. أروح فين بقى من الورطة دي..؟ ونزلت.. وعلى وشي ابتسامة صفرا.. وحمرا.. وحضرا.. ولمحتني لولو في المراية.. ما هو خطيبها سايق.. وهيه جنبه.. وأنا مرمية ورا..
وفضلوا الاثنين يتريقوا عليَّا.. وبقيت النشاط المسائي للتريقة يلا نتريق على روبي شوية.. وفعلاً مخلوش حاجة غير لما اتَّرْيقوا عليها..كل دا علشان يخرجوني من حالة الكآبة اللي أنا عايشة فيها.. بس أبدًا هو أنا أقدر أفك كده بسرعة من غير ما أعكنن على كل اللي حواليا..دا حتى النهادرة إجازة ولازم الخنقة تبقي للركب..
وسألتها: رايحين فين يا لولو.. هنطفح فين..؟
بصلتي بقرف أويييييييييييي..ومرديتش عليَّا.. فوجهت السؤال لإيمو: رايحين فين يا إيمو.. هنطفح فين..؟
فقال لي: مالك بس قرفانة ليه إيه اللي مضايقك.. هو أنت أول ولا آخر واحدة تأخذ بمبة.. عادي الظروف في العالم كله كده.. وبعدين خلاص يا ستي متحطيش 92 حطي 80 هوه الوحيد اللي لسه مغليش..
أنا: ليه إن شاء الله دي بالتقسيط خمس سنين يعني هفضل أدفع لحد ما يبانلي صحاب.. دا على كده كويس خالص إنها 1500 سي سي.. مع إني كنت هموت على حاجة 1600.. يعني مكنتش هبقى ملاحقة بقى منين وللا منين البنزين.. وللا من الضرايب.. والنبي بلا نيلة.. أنا في حالة هستريا من ساعة البنزين ما غلي.. ماما بتقولي: ابقي شيليها على كتفك وروحي بيها الشغل رايح جاي.. وللا أقولك أجَّرِلْهَا حمار يجرها أحسن.. شفتي يا لولو.. شفت ياإيمو.. حتى أمي الموضوع قلب معها بكوميديا.. تعرف أنا فكرت أدرس ميكانيكا.. يمكن أوصل لاختراع يخللي العربيات تشتغل بالمياه.. لا أنا هخليها تمشي بالطاقة الشمسية.. أهي الشمس هي الحاجة الوحيدة اللي ببلاش في بلدنا.. الحق قبل ما تغلي هي كمان)..
لولو: سيبك بقى من الكلام ده وركزي بس في الأكل.. أنا اللي عزماكي متخفيش.. مش هتدفعي حاجة وبعدين دا أنا برضه اللي عديت عليكي.. لِمِّي نفسك بقى.. وخلينا ننبسط بالأكلة الحلوة.. بلا بنزين بلا سياسة.. بلا وجع دماغ.
وبصيت للبنت لولو وسكت.. على رأيها يعني ماهي علينا كلنا.. هي عليَّا أنا لوحدي.. وركزت في الطريق لقيت إيمو متجهًا ناحية باب اللوق.. ياااااااه.. قد إيه انبسطت.. لأني عرفت هناكل فين.. أجدع واحد بتاع حمام فيكي يا بلد.. عم شلبي.. بتاع الحمام.. آه ولله.. حاجة الواحد يرم بيها اكتئابه وخنقته..
ودخلنا إحنا الثلاثة.. وكنت أول من جلس على الترابيزة.. كنت مبسوطة خالص.. كان بقالي كتييييييييييير.. نفسي آكل حمام.. عاملة زي العيل اللي قالو له هنوديك المراجيح.. ولا رايحين المولد.. ولا هنجيبلك عسلية..
بس لما دخلت مالقيتش عم شلبي وزعلت أوي أني ماشفتوش.. وبصراحة اتكسفت أسال عليه.. وطلب إيمو 4 فرد حمام.. ووصل الحمام يااااااااااااه على الجمال.. إيه الطعامة دي.. وكل واحد فينا أخذ واحدة..
ومنطقتش بكلمة طول فترة مصمصتي للعظم.. وفضلت أغمس من الطحينة.. لحد ما خلصت هي والسلطة.. وحبست بكوباية شوربة الحمام التمام.. وبقيت خلاص مش قادرة أتحرك.. وبصتلي لولو.. وهي بتقول: إيه رأيك يا روبي لو نأخد 4 فرد كمان.. خلينا نغب في الأكل.. أنا عارفة إنك بتحبي تأكلي كتير وأنت مخنوقة..
أنا: لا يا لولو أنا اللي أكلت 2 لوحدي وأنت واحدة وإيمو واحدة.. الدور الجاي ده ماليش فيه بقى.. علشان الدايت أنا كده بوظته..
إيمو: دايت إيه يا روبي.. أنت فاضل تاكليني أنا ولولو.
وطلب إيمو 4 فرد تانيين.. ووصل الحمام بالشوربة بتاعته تاني.. والجرسون بيحط الأكل على الترابيزة سألته هو كدا الحساب هيتكلف كام..؟ وبصت لي لولو وقالت: (هوه أنا مش قلت إن إحنا عازمينك).. وقلت للجرسون قول بس أنا عايزة أعرف ..
بص لي الجروسون وقالي (يا هانم أسعارنا زي ما هيه.. ما زاديتش غير جنيه أو اثنين.. احنا مزودناش 30% خللي الناس تاكل وتهيص.. هي هتبقي من كله.. بالهنا والشفا يا ست الكل.
بصيت للولو وإيمو وقلت للجرسون: طب وحياة والدك (طحينة وشوية سلطة كمان)..ومديت إيدي لطبق الحمام وأخدت فردتين حمام وقعدت أمصص وآكل في الحمام التحفة..وفضل إيمو ولولو يبصولي ويضحكوا..