مس ايجيبت

كل سنة إعلانات في كل الجرايد والمجلات عن ملكة جمال مصر.. مس إيجيبت.. والدنيا تقوم ومتقعدش.. وبنات زي الفل تروح تقدم في المسابقة.. وإيه الدنيا بتبقى هيصة.. ومن كتر الخنقة اللي أنا عايشة فيها.. قلت أروح أقدم في المسابقة علشان أبقى مس إيجيبت.. بس أنا كده هبقى مس إيجيبت في الخنقة.. لا بجد فكرة والله.. وليه لأ.. أروح أغير جو.. وأقعد شوية مع البنات الهايلين دول على البيسين.. وأتفرج على الحفلات اللي بتبقى ملط زلط.. ومطربات ومطربين.. وصحافة.. وتصوير وتلفزيون وإيه..؟ حاجة ولا الأحلام.. بس طبعا هيضايقني شوية.. موضوع عرض المايوهات.. مش عارفة.. نبقى نشوف صرفة للقصة دي.. قال مايوهات قال.. وعجبتني الفكرة.. ونمت بحلم بيها قدام التلفزيون وأنا ماسكة.. كتاب أنا حرة بتاع إحسان عبد القدوس.. غفلت ثواني.. وحلمت أني دخلت المسابقة.. وطبعا لقيت البنات في الحلم.. كلهم حلوين.. كلهم هايلين.. بس همه حلوين بس.. بس.. وبعدين دول عشرين.. فين باقي بنات مصر.. ليه مش موجودين.. هي المسابقة مش اسمها مس إيجبت.. ليه مافيهاش صحفيات.. مخرجات.. داكاترة.. مهندسات.. أوحتى بياعات فجل.. مش دول برضو بنات مصر.. يعني مس إيجيبت بتبقى للبنات المتقدمين بس.. وفي وسط الحلم شفت البنات بيقطعو في شعور بعض.. علشان ياخدو اللقب.. وبيضربوا بعض بالشلاليت.. وبيشنكلوا بعض.. وبيعضوا بعض.. يا ستار يارب.. وبعدين بقى.. لقيتهم بيتكلموا في إيه.. لا حد بيتكلم في مشاكل الأمية.. ولا الفقر.. ولا اضطهاد البنات.. ولا قهر الستات.. ولا البطالة.. ولا واحدة فيهم ماسكة كتاب.. تقرلها كلمتين ينفعوها.. لا إيه الحوار كله كان على الموضة.. والماكياج.. وأي كلام.. في الأحلام.. وفي الحلم كمان شفت.. إن البنت اللي خدت مس إيجبت.. مكنتش عارفة تكتب اسمها بالعربي.. وكانت بتتهجي الحروف.. فتفزعت.. وقمت من الحلم الوحش ده..
وقلت لا.. أنا مش ممكن أقدم في المسابقة دي.. دي حاجة يعععععععع..خالص..إزاي وأنا عاملة بقى مثقفة.. أروح أقف في صف الجهلة دول.. دول حتى مش بيعرفوا.. يكتبوا عربي.. بس بقيت بسأل جوه نفسي يا تري البنات دي.. فعلا كده.. دماغها فاضية.. ومخوخين من جوا.. ولا همه مثقفين.. وفاهمين.. فعلشان كده بيختاروا واحدة منهم تمثل كل بنات مصر.. يمكن بيتكلموا 7 لغات مثلا.. يمكن بيحضروا دراسات عليا في مجالات سرية مثلا.. غير مصرح أمنيًّا الكلام عنها.. أو يمكن دول من نسل نفرتيتي.. وشجرة الدر.. وإيزيس.. مبقتش عارفة غير إني أكمل قراءة رواية..
أنا حرة.. وأشرب النسكافية اللي برد.. وأنا بحلم أني ممكن أكون مس إيجيبت..