بيب..بيب..مصري

مبروك أيها الشعب.. الباكي الضحوك.. مبروك لأنك فرحان من كل قلبك ومبسوط ومزقطت..
مبروك لأنك رفعت العلم.. والعلم رفرف.. والعلم على فكرة رمز للشعب والأرض والتراب مش للحكومة..
مبروك لأنك برغم إن فيه ناس كتير مش مقدرة ومسميين الفرحة دي تفاهمة ودماغ فاضية..
فرحان..
مبروك لأننا فرشنا الأرض بفرحتنا واتحادنا.. ولمتنا مع بعض.. مسلمين ومسحين..
مبروك لمصر التراب والأرض والشعب.. لأنها حست إن كل أخواتها العرب فرحانين ليها.. واقفين جنبها.. وكمان دافعين ملايين من جيوبهم لمنتخبنا..
مبروك لأنك يا منتخبنا جبتلنا الكأس.. وعلشان ربنا معانا.. جبنا الكأس من غانا.. زي ما كل الشعب قال وعلَّى صوته في شوارعك وميادينك يا بلدي..
أي نعم إحنا ماجبناش الديب من ديلة.. بس على الأقل منتخبنا فرح الناس المطحونين.. الغلبانين.. اللي مش لاقيين حق لقمة العيش.. اللي وهمه قاعدين على القهوة يمكن مش لاقيين ثمن كوباية الشاي ويمكن حد من جيرانه يدفعها له.. بيتفرجوا على الفرح بتاعنا اللي كان عرسانه (حسن شحاته.. وأبو تريكة.. وأحمد حسن.. وزيدان.. وعمرو زكي.. ومتعب.. وإبراهيم سعيد.. وكل الأسماء اللي رجليها خطت الملعب أو مخطيتهاش).. قاعدين مركزين ومبوسطين..
مبروك لأن العيال الصغيرة.. خرجت تدق على الطبول وتقول: مصر.. مصر.. مصر.. يمكن ده يعلمهم الانتماء والوطنية اللي أكيد مبيسمعوش عنها في المدارس.. وتكاد تكون كمان انتهت من البيوت.. الناس فرحت ياللي مش عايزنا نفرح ومستكترين علينا الفرحة إحنا المصريين.. باسم السياسة والأرض والحدود والاقتصاد وارتفاع الأسعار.. واتجاه التعليم ليصبح أمية.. وكتر الحرمية.. وغلو الكهرباء والميه..
مبروك لِيَّا أنا بنت الحي الشعبي.. اللي اتغربت سنين وعشت برا ترابك يا بلدي.. سنين.. مبروك لِيَّا لأني مصرية عندي دم مصري بيجري في عروقي.. مبروك لِيَّا لأني يا بلدي هندفن في ترابك.. مبروك لينا إحنا الشعب لأننا بنحبك.. برغم كل سلبيات الوطن وعراقيل التطور.. وانتفاع المنتفعين..
مبروك لينا يا شعب.. يا مطحون.. الفرحة.. اللي فرحناها لو حتى على التلفزيون.. يمكن متكنش حقيقة.. ويمكن تكون مُسَكِّن مؤقت لأزمات كتيرة زي الإسكان والبطالة والعشوائيات.. والكلام الكبير ده اللي يمكن ميكنش وقته دلوقتي..
مبروك يا شعبي الباكي الضحوك.. لأنك في وسط ما أنت تبكي دموع يمكن يكون أغلبها دم.. علشان أنت وحيد مش لاقي ثمن الدوا في حتت كتير.. مش لاقي ثمن رغيف العيش اللي قرب يوصل لخميسن قرش.. وساعات كتير بتكاله حاف.. لأن مبقاش فيه حاجة اسمها بخمسين قرش فول.. قادر تضحك وتبتسم وتفرح.. وتدعي لبلدك اللي ساعات بتيجي عليك.. وبدأت تعمل زي القطة اللي بتاكل في عيالها..
لأنك يا شعب قادر تفرح وتجري وتشيل العلم.. وتخليه يرفرف.. وعقبال ما يرفرف.. واحنا منتصرين في مجالات تانية كتير.. ومعندناش بطالة ولا عندنا فقر.. ولا مرض.. ولا أمية.. ولا خد وهات من تحت الترابيزة.. ولا ناس بتسرق وتسافر.. ولا حرامية كده عيني عينك.. مبروك لينا يا شعبنا انتصار منتخبنا.. مبروك يا شعبي الباكي الضحوك..
كل الكلام اللي فات أنا قلته من قلبي ساعة ما كسبنا البطولة الافريقة بتاعة 2008.. لمَّا واحدة صاحبتي مش مصرية اتهمتنا إن إحنا شعب هايف.. شعب مش لاقي حاجة يعملها.. فوجعني الكلام وحبيت أرد عليها بالكلمتين دول...
لأن كلامها عن هيافة شعب بحاله خلاني مخنوقة آخر خنقة..