حماتي

- سامية : يا حماتي..يا حماتي…ردي عليا الله يخليكي…ولله يا حماتي لو سبت الفراخ علي النار هتتحرق..وترجعي تسمعيني كلمتين..افتحي الباب ابوس ايدك..اللي علي الباب ايده تقيله هيكسره خلاص…
-ام سيد : ولله يا بنتي ما انا قادرة ..ما انت عارفة رجليه بتنشر عليه..يلا بقي حسن الختام..
- سامية : كدا يا حماتي..طب لوالفراخ اتحرقت..مش هتسممي بدني..وترجعي تقوليلي..لا بتعرفي تطبخي ولا تغسلي..وان ابنك واخد واحده اي كلام..
-ام سيد : معلش بقي يا عيني عليك يا ابني..نصيب قليل وبختك منيل ..يابنتي خلاص بقي ماتجوزتوا واللي كان كان هنعمل ايه كل شئ قسمة ونصيب...
- سامية : كدا يا حماتي برضو ..ما انا عارفة انك مكنتيش عايزة تخلينا نتجوز...وكنت عايزه يخطب البت بت اختك ..
-ام سيد : يا ختي..البت بت اختي دي كانت..بياض ومتختخه كدا..قشطة ..كانت تخينه اه..بس زي الفل يلا بقي..وعندها دلوقتي بدل العيل خمسة ..
- سامية: قصدك ايه يا حماتي...هو اكمني سمرا يعني ورفيعة..دا انا زي القمر...مش احسن ما بقي زي الدبه وبرتا..ابقي رفيعة كدا وزي النحلة ..طب تصدقي بالله يا حماتي
-ام سيد : لا اله الا الله يا عيون حماتك..
- سامية: عيون حماتي..انت بتتريقي عليا يا ام سيد..كدا برضو..بس ماشي ست كبيرة بقي..وعلي العموم انت عارفة كويس ان ابنك حفي عشان يتجوزني..واهلي ماكنوش راضيين..طبعا بنت المعلمين..تتجوز واحد علي قد حاله ..
-ام سيد : بقي اسم النبي حارسك واخده واحد علي قد حاله برضو ..دا خريج جامعه يا عين حماتك...تعليم عالي ..يا خريجة الابتدائية..
- سامية: طب يا حماتي والنبي لنتي فاتحه الباب..مش سامعه الدق خلاص مش هقدر اسيب الفراخ انت قاعده جنب الباب يا حماتي..
-ام سيد : لا مش قادرة.. وبعدين تعالي هنا انت ليه مرحتيش تزوري اخت جوزك ..بعد ما جوزها رجع من السفر...مش عيب عليكي برضو..دي بنتي..
- سامية: يا حماتي..حرام عليكي هو انت طلباتك بتخلص..هو انا عارفة اصلا اشوف امي..علشان ازور بنتك...
-ام سيد : بقولك ايه يا مرات ابني..عارفة لو مرحتيش تزوري اخت جوزك..انت حره بقي..
- سامية: قوليلي يا حماتي..احمرلك حته الفرخه بتاعتك ولا عيزاها مسلوقة زي الدكتور ما قالك..
- ام سيد : حمريها..وفي الزبدة البلدي كمان..انت كمان مش عايزة تأكليني..انا عايشة في خير ابني..انت فاهمة..ولا تكنيش بتصرفي عليا من جيبك..
- سامية: يا حماتي انا خايفة علي صحتك..مش الدكتور قال بلاش المحمر والسمن البلدي..والاكل المسبك..وبعدين انا طول النهار واقفة في المطبخ علشانك..اعمل فطار..وبعدين شاي الظهر..وحاجة علي ما قسم الساعة 2..واوعي الاكل يتاخر عن الساعة 4..وبعدين نحلي بعد المغرب..والعشا ..لازم يكون بعد العشاء علطول..دا انا لو شغاله في مطعم اكيد هريح شوية.ايه مش بتتعبي يا حماتي من الاكل..
-ام سيد : ينهارك منيل بستين نيله..بتعدي عليا الاكل يا بت..ليه يكونش ابوكي الجزار هو اللي بيجبلنا الاكل واحنا مش واخدين بالنا..
- سامية: ايوة يا حماتي انا ابوية ...مش مخليني عايزة حاجة..خيره عليا حتي بعد ما اتجوزت..سيد..الفاكهة والفراخ واللحمة..والخزين..كله يا ختي اول باول..
-ام سيد : ماشي يا بنت الجزار لما يجي سيد ولله لنا قيلاله انك بتقولي انك عايشة في خير ابوكي ومش عايشة في خير جوزك..
- سامية: طب افتحي الباب
-ام سيد : لا
- سامية: عارفة يا حماتي انا عايشة بحس سيد في الدنيا ..هو انا اسوي حاجة من غير سيد..ربنا يخليه ليا..ساترني..ومهنني..ومالي الدنيا عليا..
-ام سيد : ايوه مالي الدنيا عليكي..ماانت مش عارفة تجبلنا حته عيل..يفرح قلبي..
- سامية: عارفة يا حماتي انا لو دخلت الجنه ..
-ام سيد : جنه يا عيون حماتك ابقي قابليني..
- سامية : ايوه انا هدخل الجنه مخصوص علشان مستحملاكي..وصابرة عليكي وعلي كلامك اللي يسم البدن دا..وبعدين ما انتي عارفة يا ام سيد ان احنا رحنا كشفنا..وانا الحمدلله زي الفل..
-ام سيد : قصدك ايه يا بت ..ان ابني مش راجل..دا راجل وسيد الراجالة..دا هو اللي طلعت بيه من الدنيا بعد ابوه الله يرحمه..
- سامية: يا حماتي سبيني اكمل كلامي ..طبعا ليكي حق ما انت مش سامعة من دق الباب اللي فوق دماغك ومش هاين عليكي تفتحي..
-ام سيد : عايزة تقولي ايه تاني كفاية اللي قولتيه..ابني مش راجل وانت عايشة في خير ابوكي ..امال متجوزاه علي ايه..
- سامية: يالهههههههههههوي يارب صبرني..حرام عليكي انا طلاقي هيبقي علي ايدك يا وليه..سيد كمان عمل التحاليل وزي الفل وانت عارفة بس ربنا لسه ماأردش..وبعدين لو مجبتش عيال خالص مش مشكلة كفاية ..سيد عليه بحنيته ..وطبته..وياه يا حماتي..مقولكيش سيد حنين قد ايه خصوصا لما بيكون باله رايئ..
-ام سيد : ايوه يا ختي ..ما انا بسمع الحنيه دي طول الليل..
- سامية: ههههههههههه..اخص عليكي يا حماتي..بتتصنتي علينا عيب دا انت ست كبيرة..
-ام سيد : وانا مالي ياختي يارب بس يجي بفايدة ..
- سامية: عارفة يا حماتي..انا عارفة انت ليه مردتيش تقلعي الاسود بعد جوزك ما مات الله يرحمه....علشان اكيد كان راجل وسيد الرجالة..زي ابنه تمام..سيدي وتاج راسي..
-ام سيد : اه وللهي يا بت..باين عليكي بتفهمي اهه..كان راجل ولا الحكايات..انت عارفة هو مات وانا عندي 23 سنة...عزي يعني..اصل انا متجوزة وعندي 16 سنة..جبت سيد وفتحيه..وهو مات بعد ما ولدت فتحيه بسنتين..يلا الله يرحمه ..كان عامل زي بتوع السيما..راجل طول بعرض..وحنين ..وكريم..وابن بلد..الناس فضلت تعيط عليه سنين لما مات..كانت تيجي سرته بس..ياه الله يرحمه بقي..ومفكرتش ابدا اتجوز بعده..ما ان
اهلي كانو بيضربوني..علشان اوافق بس ابدا..اللي تتجوز راجل زي ابو سيد لايمكن تتجوز بعده..رجل بصحيح مش زي رجالة اليومين دول..الواحد يبقي خايب ومايع..ومنسون كدا في نفسه..ربنا يحميك يا سيد يا بني ..ويرزقك بالعيال..ويهديك الحرباية مراتك..ويخليك ليا..
- سامية: انا حرباية يا حماتي..الله يسامحك..
-أم سيد : هههههههههه...بضحك معاكي يا بت وللهي انت غلبانه..
- سامية: خلاص يا حماتي انا علشان الكلمة الحلوة دي انا هاجي افتح الباب..انا خلصت أليه الفراخ..والغدا بقي جاهز..مستني سيد الرجالة..يارب بالهنا والشفا علي قلبه..وللهي يام سيد..انت مش عارفة انا بحبك قد ايه ..وبموت في منغشتك ليا..ومقدرش استنغني عنك ابدا..الهي يطول في عمرك يارب..
-ام سيد : يلا با بت تعالي افتحي الباب..انت هتاكلي بعلقي حلاوة...
- سامية: حاضر..جايه ..اهه..مين اللي علي الباب...ايوه ياللي بتخبط...مين ..
- سيد : افتحي يا سامية ..انا سيد..حرام عليكوا كل دا سايبني علي الباب وانا شايل علي قلبي كل الحاجات دي..
- سامية : يا لهوي...معلش يا خويا حقك عليا..هات عنك..
- سيد: كدا ياما برضو..مش هاين عليكي تفتحي الباب..
-ام سيد : يوووووه..ما انا قلت مين محدش رد..كسلت اقوم افتح..وبعدين دا بدل ما تيجي تبوس ايد امك وتقولها ازيك ياما..هتزعق فيا..
- سيد : لا ياما العفو..ازيك يا ست الكل وادي ايدك ابوسها..
-ام سيد: شفت مراتك بتقول ايه عليك..
- سامية: يا حماتي طب استني لما ياخد نفسه..
- سيد : عارف ياما قالت ايه ..وعارف انت قلتي ايه ..ما انا بقالي ساعة واقف علي الباب..وانتو الاثنين كل واحد صوتها قد كدا عشان التانية تسمع..تقولش عايشين في فيلا يا خي..هي حته قوضة وصالة ودورة المياة والمطبخ..سمعتوا الجيران صوتكو..
-ام سيد: يووووه..هو انت سمعتنا..
- سيد : ايوه ياما..يا اصيلة لسه فاكره ابويا بعد كل السنين دي..
-ام سيد : يابني وللهي الدمعة فرت من عيني لما البنت مراتك جابت سرت ابوك ..
- سيد : والنبي ياما خليكي حنيه عليها شوية ..دي ملهاش غيرنا دلوقتي..
-ام سيد : عارف يا واد يا سيد وللهي بحبها بس بحب ارغي معاها وشوفها هتستحملني..ولا.. لأ..
- سيد : عارف ياما عارف..
- سامية: الاكل جاهز يا سيد ..يلا يا ام سيد ..الاكل.. هيبرد..يلا يا سيد علشان تحلق تنام شوية بعد الغدا..
-ام سيد : اهمدي يا مرات ابني..الواد جاي تعبان..ارحميه..ينام ايه دلوقتي..
- سامية: يا حماتي بعد الغداء يريحلة شوية حرام دا شقيان..
-ام سيد : يا بنت اطلعي من دول..ما هو كله شقي..
- سيد : خلاص ياما..الاكل بقي...اجي احضر معاكي يا سامية..
- سامية: تعالي يا سيد..
-ام سيد : تعالي يا سيد ..ماشي يا سامية ..طبعا عايزة تاخديه من حضن امه
- سيد : ياما اساعدها برضو..
-ام سيد : روح يا بني روح..لله يسهل لكو..
- سيد : معلش يا سامية استحمليها..امك برضو..
- سامية: فعنيا يا سيد وللهي كله علشان خاطر عنيك..
- سيد : يلا بقي علشان الاكل هيبرد..وعلي فكرة وحشتيني يا بت..
- سامية: تسلملي يا راجلي..يلا يا حماتي الفراخ اللي بالزيدة البلدي بردت..حماتي دا ايه.. لا وللهي لنا مناديالك وهقولك ياما..اشمعنا سيد..مش انت ام سيد..نور عيني وسيدي ورجلي..تبقي امي انا كمان..ومهما عاملتي..ولا قولتي برضو امي...ربنا يخليكي لينا وميحرمناش منك ابدا...