المطافي

شيء مهم أوي أن كل إنسان يكون عنده تفاصيل كل الأجهزة الأمنية اللي في البلد والخدمات..
يعني تعرف عنوان ومكان أقرب إسعاف ليك.. وكمان طبعًا أرقام التليفونات للطوارئ.. أرقام المطافي وعنوانهم ومكانهم في المنطقة اللي أنت موجود فيها.. أرقام ومكان أقرب مركز نجدة ليك.. علشان الظروف يعني لو فيه حريقة.. لو مش عارف رقم التليفون تجري على المكان وتقولهم الحقوني.. عندنا حريقة عقبال عندكم..
فلما أتصل بالتليفون بالمطافي وأقول السلام عليكم ..
يرد عليا واحد يبان من صوته إنه حد بيفهم يعني مش مجند طالع عينه ولا بيفهم في الطور ولا في الطحين..حد مهم لأنه كان شايف نفسه أوي بيتكلم من طراطيف مناخيره..
ويقول (وعليكم) من غير حتى ما يكمل باقي السلام..
ثم أسأل.. من فضلك يا فندم عايزة أعرف مكانكم بالضبط فين العنوان يعني حضرتك..
فيقول: اشمعنا..
استغربت أوي بصراحة وقلت له..هو حضرتك ايه اللي اشمعنا.. عايزة العنوان أعرف مكانكم فين بالضبط علشان الظروف يعني لو حصل حاجة لا قدر الله ومعرفناش نوصل للمطافي بالتليفون..
قال لي: مفهمتش برضه عايزة العنوان ليه؟؟
قلت: وهوه مش من حق أي مواطن يعرف المطافي فين..؟ ولا دا يهدد أمن البلد إني أعرف مكان المطافي..
راح شاخط فيَّ وقال لي أنت هتدخلي قافية.. عايزة العنوان ليه..؟
أنا بقى بصراحة لما شخط فيَّ اتفزعت وصوتي كده وطي.. وقلت: يا فندم ما قلت لحضرتك..
عايزاه ليه يعني..؟ وكان صوته مجلجل..
قلت له: بصراحة.. خلاص مش عايزة.. شكراً.. وقفلت بسرعة قبل ما يمد إيده من التليفون ويمسك في زمارة رقبتي ويقول لي عايزة العنوان ليه.. هو أنت اللي عايزاه ولا فيه جهه دولية هي اللي بتسأل.. هو أنت اللي عايزاه ولا ده تنظيم سري لضرب المنشآت الحيوية في البلد..؟
صعبت عليَّ نفسي أوي.. هوه بيشخط كده ليه.. هو أنا كنت طلبت سر حربي يعني.. دا العنوان.. وقفلت وفضلت باصَّة في لوحة كانت قدامي مكتوب عليها (ادخلوها بسلام آمنين)..
وقلت ده حتى يا ربي.. مش عارفين نوصل لعنوان أقرب مطافي جنبنا.. فين الأمان بقي..